yaaro duaa karo ye koi haadsa na ho — Shakeel Jazib

yahaan pe kuchh bhi nahin hai baaqi tu aks apnaa talaash mat kar
miri nigaahon ke aaine ab ghubaar-e-furqat se aT gae hain

mujh ko ataa huaa hai ye kaisaa libaas-e-zist
baDhte hain jis ke chaak baraabar rafu ke saath

us ki bhi miri tarah thi ik apni kahaani
us ko bhi nibhaanaa paDaa kirdaar mujhe bhi

kyaa karun ai tishnagi teraa mudaavaa bas vo lab
jin labon ko chhu ke paani aag bantaa jaae hai

kyaa kisi ummid par phir se dar-e-dil vaa karun
tujh se baDh kar khud bataa meraa shanaasaa kaun thaa

taaza vaarid huun miyaan aur ye shahr-e-dil hai
kuchh kamaane ko yahaan kaar-e-ziyaan DhunDtaa huun

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

jab ki pahlu se yaar uThtaa hai
dard be-ikhtiyaar uThtaa hai

ajnabi bud-o-baash ke qurb-o-javaar mein milaa
bichhDaa to vo mujhe kisi aur dayaar mein milaa

khud se likhne kaa ikhtiyaar bhi de
varna qismat ki takhtiyaan le jaa

vafaa ki pyaar ki gham ki kahaaniyaan likh kar
sahar ke haath mein dil ki kitaab detaa huun

jalaao gham ke diye pyaar ki nigaahon mein
ki tirgi hai bahut zindagi ki raahon mein