vafaa ki pyaar ki gham ki kahaaniyaan likh kar — Khurshid Ahmad Jami

baDe dilchasp vaade the baDe rangin dhoke the
gulon ki aarzu mein zindagi shole uThaa laai

pahchaan bhi saki na miri zindagi mujhe
itni ravaa-ravi mein kahin saamnaa huaa

zindagaani ke hasin shahr mein aa kar 'jaami'
zindagaani se kahin haath milaae bhi nahin

koi halchal hai na aahaT na sadaa hai koi
dil ki dahliz pe chup-chaap khaDaa hai koi

sahar ke saath chale raushni ke saath chale
tamaam umr kisi ajnabi ke saath chale

chamakte khvaab milte hain mahakte pyaar milte hain
tumhaare shahr mein kitne hasin aazaar milte hain

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

milne diyaa na us se hamein jis khayaal ne
sochaa to us khayaal se sadma bahut huaa

mujhe manzur gar tark-e-ta'alluq hai razaa teri
magar TuTegaa rishta dard kaa aahista aahista

aanaa zaraa tafrih rahegi
ik mahfil-e-sadmaat kareinge