tum aasmaan ki bulandi se jald lauT aanaa — Shayar Jamali

yuun bhi kaT sakte hain ye tishna-labi ke lamhaat
baiTh kar bazm mein saaqi ko duaa dein ham log

jis ke saae mein taassub ki tapish shaamil ho
vaqt kahtaa hai vo divaar giraa dein ham log

aur agar ho na sake kuchh bhi ujaalon ki sabil
ik charaagh apne lahu se hi jalaa dein ham log

chhup gayaa eid kaa chaand nikal kar der hui par jaane kyon
nazrein ab tak Tiki hui hain masjid ke minaaron par

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

maarka garm to ho lene do khun-rezi kaa
pahle shamshir ke niche hamin jaa baiTheinge