jin ko qudarat hai takhayyul par unhein dikhtaa nahin — Shuja Khaavar

'shujaa' vo khairiyat puchhein to hairat mein na paD jaanaa
pareshaan karne vaale khair-khvaahon mein bhi hote hain

chaaragari ki baat kisi aur se karo
ab ho gae hain yaaro puraane mariz ham

us ke bayaan se hue har-dil-aziz ham
gham ko samajh rahe the chhupaane ki chiiz ham

tangi-e-haiat se Takraataa huaa josh-e-mavaad
shaaeri kaa lutf aa jaataa hai chhoTi bahr mein

yaa to jo naa-fahm hain vo bolte hain in dinon
yaa jinhein khaamosh rahne ki sazaa maalum hai

do chaar nahin sainkaDon sher us pe kahe hain
is par bhi vo samjhe na to qadmon pe jhukein kyaa

mujid jo nuur kaa hai vo meraa charaagh hai
parvaana huun main anjuman-e-kaaenaat kaa

dil ko honaa hai fanaa rahnaa hai qaaem aql ko
hasti-e-aadam kahaan jaae ye fitrat chhoD kar

ham bhi dariyaa hain hamein apnaa hunar maalum hai
jis taraf bhi chal paDeinge raasta ho jaaegaa

fitrat mein aadmi ki hai mubham saa ek khauf
us khauf kaa kisi ne khudaa naam rakh diyaa

vo ab aate nahin dariyaa kinaare
utarte the jo gahre paaniyon mein

musibat kaa pahaaD aakhir kisi din kaT hi jaaegaa
mujhe sar maar kar teshe se mar jaanaa nahin aataa