tu samajhtaa hai gar fuzul mujhe — Nadeem Gullani

tamaam umr tire intizaar mein hamdam
khizaan-rasida rahaa huun bahaar kar mujh ko

umr bhar rahnaa hai taabir se gar duur tumhein
phir mire khvaab mein aane ki zarurat kyaa hai

tujh se main jang kaa elaan bhi kar hi dungaa
mere dushman tu mire qad ke baraabar to aa

tumhein hamaari mohabbaton ke hasin jazbe bulaa rahe hain
jo ham ne likkhe the tum pe hamdam vo saare naghme bulaa rahe hain

nahin hai jis kaa hal ab to koi 'nadim' bas ik sivaa tumhaare
main ek aisaa hi masala huun mujhe duaaon mein yaad rakhnaa

duniyaa badal gai thi koi gham na thaa mujhe
tum bhi badal gae the ye hairaani khaa gai

tirgi mein aadmi ko hausla dete hue
har sitaare ko farishta maan lenaa chaahiye

thaa e'timaad-e-husn se tu is qadar tahi
aaina dekhne kaa tujhe hausla na thaa

ki ik nazar ki tuur saraapaa jalaa diyaa
kis hausle pe koi tiri aarzu kare

savaal karne ke hausle se javaab dene ke faisle tak
jo vaqfa-e-sabr aa gayaa thaa usi ki lazzat mein aa basaa huun

harf saare bol uTThein jab bhi main likhne lagun
ab koi jazba miraa mahv-e-duaa lagtaa nahin

ye soch kar tiri mahfil se ham chale aae
ki ek baar to baDh jaae hausla dil kaa