dimaagh ko kar rahaa huun raushan main daagh-e-dil ke jalaa rahaa huun — Sohail Azeemabadi

kyaa lutf hai aise jiine kaa jis ki na kisi ko parvaa ho
kis kaam kaa marnaa vo marnaa jis kaa ki kisi ko gham na huaa

khaak uchhaalo jo zamin par to falak par gir jaae
ab khulaa ye ki bahut past hai himmat meri

vo raatein kaif mein Duubi vo teri pyaar ki baatein
nikal paDte hain aansu jab kabhi ham yaad karte hain

ai hasrat-e-dil go vasl huaa par shauq hamaaraa kam na huaa
jis se ki khalish kuchh aur baDhe vo zakhm huaa marham na huaa

vo kaun dil hai jahaan mein kah duun jise ki ye aap kaa nahin hai
ghazab to ye hai ki meraa dil hai magar miraa ham-navaa nahin hai

kyaa gham hai jo ham gumnaam rahe tum to na magar badnaam hue
achchhaa hai ki mere marne par duniyaa mein miraa maatam na huaa

kam-umri mein sunet hain
mar jaate hain achchhe log

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

idhar to tuul diyaa hai umiid ko us ne
udhar hayaat ataa ki hai mukhtasar mujh ko

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein