ai hasrat-e-dil go vasl huaa par shauq hamaaraa kam na huaa — Sohail Azeemabadi

kyaa lutf hai aise jiine kaa jis ki na kisi ko parvaa ho
kis kaam kaa marnaa vo marnaa jis kaa ki kisi ko gham na huaa

khaak uchhaalo jo zamin par to falak par gir jaae
ab khulaa ye ki bahut past hai himmat meri

vo raatein kaif mein Duubi vo teri pyaar ki baatein
nikal paDte hain aansu jab kabhi ham yaad karte hain

vo kaun dil hai jahaan mein kah duun jise ki ye aap kaa nahin hai
ghazab to ye hai ki meraa dil hai magar miraa ham-navaa nahin hai

dimaagh ko kar rahaa huun raushan main daagh-e-dil ke jalaa rahaa huun
ab apni taarik zindagi kaa nayaa saraapaa banaa rahaa huun

kyaa gham hai jo ham gumnaam rahe tum to na magar badnaam hue
achchhaa hai ki mere marne par duniyaa mein miraa maatam na huaa

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

ham kisi sultaan ke taabe nahin 'aabid-vadud'
ham vo kahte hain jo apne dil pe hai guzri hui

yaad bhi teri miT gai dil se
aur kyaa rah gayaa hai hone ko

dil arsh-gaah-e-husn hai dil jalva-gaah-e-naaz
ye aap hi kaa ghar hai hamaari guzar kahaan

na puchho jaan par kyaa kuchh guzarti hai gham-e-dil se
qaraar aanaa kahaan kaa saans bhi aati hai mushkil se