kaun kis kaa gham khaae kaun kis ko bahlaae — Sufi Ghulam Mustafa Tabassum

jaane kis ki thi khataa yaad nahin
ham hue kaise judaa yaad nahin

main tohfa le ke aayaa huun tamannaaon ke phulon kaa
luTaane ko bahaar-e-zindagaani le ke aayaa huun

dilon kaa zikr hi kyaa hai milein milein na milein
nazar milaao nazar se nazar ki baat karo

sau baar chaman mahkaa sau baar bahaar aai
duniyaa ki vahi raunaq dil ki vahi tanhaai

is aalam-e-viraan mein kyaa anjuman-aaraai
do roz ki mahfil hai ik umr ki tanhaai

ik faqat yaad hai jaanaa un kaa
aur kuchh is ke sivaa yaad nahin

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

ye saal tul-e-masaafat se chuur chuur gayaa
ye ek saal to guzraa hai ik sadi ki tarah

naaz kar naaz tire naaz pe hai naaz mujhe
meri tanhaai hai partav tiri yaktaai kaa

main aa kar dushmanon mein bas gayaa huun
yahaan hamdard hain do-chaar mere