manzil na mili to gham nahin hai — Syed Ehtisham Husain

teraa hi ho ke jo rah jaaun to phir kyaa hogaa
ai junun aur hain duniyaa mein bahut kaam mujhe

dil ne chupke se kahaa koshish-e-naakaam ke baad
zahr hi dard-e-mohabbat ki davaa ho jaise

na jaane haar hai yaa jiit kyaa hai
ghamon par muskuraanaa aa gayaa hai

yuun guzartaa hai tiri yaad ki vaadi mein khayaal
khaarzaaron mein koi barhana-paa ho jaise

main samajhtaa huun mujhe daulat-e-kaunain mili
kaun kahtaa hai ki vo kar gae badnaam mujhe

bujhin shamein to dil jalaae hain
yuun andheron mein raushni ki hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

tujhe bhi dekh liyaa ham ne o khudaa-e-ajal
ki teraa zor chalaa bhi to ahl-e-gham pe chalaa

tum jo chaaho to mire dard kaa darmaan ho jaae
varna mushkil hai ki mushkil miri aasaan ho jaae

ik sadma-e-mohabbat ik sadma-e-judaai
ginti ke do hain lekin laakhon ki jaan par hain