dard-e-dil chhoD jaaiye so kahaan — Syed Mohammad Meer Asar

kin ne kahaa aur se na mil tu
par ham se bhi kabhu milaa kar

kyaa kahun kis tarah se jiitaa huun
gham ko khaataa huun aansu piitaa huun

bevafaa kuchh nahin teri taqsir
mujh ko meri vafaa hi raas nahin

apne nazdik dard-e-dil main kahaa
tere nazdik qissa-khvaani ki

tu hi behtar hai aaina ham se
ham to itne bhi ru-shanaas nahin

jis ghaDi ghurte ho ghussa se
nikle paDtaa hai pyaar aankhon mein

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

ik sadma-e-mohabbat ik sadma-e-judaai
ginti ke do hain lekin laakhon ki jaan par hain

tasadduq hone vaale pis na jaaein
uThaae haath se daaman ko chaliye

sar se dayaar-e-gham ke sanichar utaar de
mangal hai jis mein jaa ke vo jangal uThaa to laa