hamaari baat kaaTi jaa rahi hai — Syed Zamin Abbas Kazmi

savaal-e-vasl pe ik baar aur ghaur karein
bajaa ki soch liyaa hai durust hai phir bhi

main jo kahtaa huun mujh se duur raho
ye nasihat hai iltimaas nahin

tumhaari baat se itnaa bhi dukh nahin pahunchaa
magar jo pahunchaa tumhaari vazaahaton se mujhe

pahle bhi jis pe mire sabr ki had khatm hui
tu ne kar di naa vahi baat dobaara mire dost

vo kah rahaa thaa buraai buraai janti hai
so us ke vaaste le kar kanval gayaa huun main

hijr hogaa na koi hijr kaa nauha hogaa
baaz aate hain mohabbat se jo hogaa hogaa

himmat hai to buland kar aavaaz kaa alam
chup baiThne se hal nahin hone kaa masala

aariz se tire subh ki tohmat na uThegi
zulfon pe tiri shaam kaa ilzaam rahegaa

ham ki rakhte hain aasmaan ki talab
aur uDne kaa hausla bhi nahin

tirgi mein aadmi ko hausla dete hue
har sitaare ko farishta maan lenaa chaahiye

thaa e'timaad-e-husn se tu is qadar tahi
aaina dekhne kaa tujhe hausla na thaa

ki ik nazar ki tuur saraapaa jalaa diyaa
kis hausle pe koi tiri aarzu kare