ye to sach hai ki vo sitamgar hai — Umair Manzar

har baar hi main jaan se jaane mein rah gayaa
main rasm-e-zindagi jo nibhaane mein rah gayaa

banaa ke vahm o gumaan ki duniyaa haqiqaton ke saraab dekhun
main apne hi aaine mein khud ko jahaan bhi dekhun kharaab dekhun

ye mere saathi hain pyaare saathi magar inhein bhi nahin gavaaraa
main apni vahshat ke maqbare se nai tamannaa ke khvaab dekhun

tazkira ho tiraa zamaane mein
aisaa pahlu koi bayaan mein rakh

is mahfil mein main bhi kyaa bebaak huaa
aib o hunar kaa saaraa parda chaak huaa

sunaa ye thaa bahut aasuda hain saahil ke baashinde
magar TuuTi hui kashti mein dariyaa paar honaa thaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

gham hai na ab khushi hai na ummid hai na yaas
sab se najaat paae zamaane guzar gae

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

main jis mein rah na sakaa ji-huzuriyon ke sabab
ye aadmi hai usi kaamyaab mausam kaa