ai dost arz-e-gham pe na yuun muskuraa ke dekh — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

vo jalva-e-sad-rang mein ik Dhang se niklaa
jo misra tire sina-o-aahang se niklaa

tanhaa tire maatam mein nahin shaam-e-siyah-posh
rahtaa hai sadaa chaak garebaan-e-sahar bhi

lamhe lamhe se bani hai ye zamaane ki kitaab
nuqta nuqta yahaan sadiyon kaa safar lagtaa hai