ghair ko dard sunaane ki zarurat kyaa hai — Unknown

log kaanTon se bach ke chalte hain
main ne phulon se zakhm khaae hain

dil TuTne se thoDi si taklif to hui
lekin tamaam umr ko aaraam ho gayaa

duniyaa mein vahi shakhs hai taazim ke qaabil
jis shakhs ne haalaat kaa rukh moD diyaa ho

miri namaaz-e-janaaza paDhi hai ghairon ne
mare the jin ke liye vo rahe vazu karte

ye hamin hain ki tiraa dard chhupaa kar dil mein
kaam duniyaa ke ba-dastur kiye jaate hain

jin ke kirdaar se aati ho sadaaqat ki mahak
un ki tadris se patthar bhi pighal sakte hain

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

aaj teri yaad se Takraa ke TukDe ho gayaa
vo jo sadiyon se luDhaktaa ek patthar mujh mein thaa

paayaa jab se zakhm kisi ko khone kaa
sikhaa fan ham ne be-aansu rone kaa

kyaa tarjumaani-e-gham-e-duniyaa karein ki jab
fan mein khud apnaa gham bhi samoyaa na jaa sakaa