khushbuon kaa nuzul hotaa thaa — Waseem Haidar

qaid kartaa huun hasratein dil mein
phir inhein khud-kushi sikhaataa huun

tujh ko ho mere lams ki khvaahish shadid-tar
tujh se tamaam 'umr miraa saamnaa na ho

suntaa rahtaa huun to vo kuchh bhi kahe jaataa hai
us ko lagtaa hai ki me'yaar yahi hai apnaa

havas na puuri hui jab kahin to 'ilm huaa
tire badan kaa rahaa mujh ko aasraa baDi der

ab vo achchhaa mujhe pasand nahin
jo buraa bhi qubul hotaa thaa

mire khamir pe saari hi sarf ho gai thi
phir us ke baa'd udaasi nai banaai gai

shor din ko nahin sone detaa
shab ko sannaaTaa jagaa detaa hai

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

hunuz raat hai jalnaa paDegaa us ko bhi
ki mere saath pighalnaa paDegaa us ko bhi

tire khayaal se raushan hai sar-zamin-e-sukhan
ki jaise zinat-e-shab ho mah-e-tamaam ke saath

raat bhar khvaab dekhne vaale
din ki sachchaaiyon mein chikh uThe