mire khamir pe saari hi sarf ho gai thi — Waseem Haidar

qaid kartaa huun hasratein dil mein
phir inhein khud-kushi sikhaataa huun

tujh ko ho mere lams ki khvaahish shadid-tar
tujh se tamaam 'umr miraa saamnaa na ho

suntaa rahtaa huun to vo kuchh bhi kahe jaataa hai
us ko lagtaa hai ki me'yaar yahi hai apnaa

havas na puuri hui jab kahin to 'ilm huaa
tire badan kaa rahaa mujh ko aasraa baDi der

ab vo achchhaa mujhe pasand nahin
jo buraa bhi qubul hotaa thaa

khushbuon kaa nuzul hotaa thaa
pahle pattaa bhi phuul hotaa thaa

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

nazar bachaa ke jo aansu kiye the main ne paak
khabar na thi yahi dhabbe baneinge daaman ke

bataa khud ko bhalaa kaise sanvaarun
mujhe gham aainon mein dikh rahaa hai

Thahri thi ghizaa apni jo gham ishq-e-butaan mein
so aah hamaari hamein khuraak ne khaayaa