ik khauf-e-dushmani jo taaaqub mein sab ke hai — Zafar Ajmi

kaasa-e-dard liye kab se khaDe sochte hain
dast-e-imkaan se kyaa chiiz na jaane nikle

ye alag baat ki vo dil se kisi aur kaa thaa
baat to us ne hamaari bhi ba-zaahir rakkhi

bajaa hai zindagi se ham bahut rahe naaraaz
magar bataao khafaa tum se bhi kabhu hue hain

kisi ke raaste ki khaak mein paDe hain 'zafar'
mataa-e-umr yahi aajizi nikalti hai

naa-khudaa chhoD gae biich bhanvar mein to 'zafar'
ek tinke ke sahaare ne kahaa bismillaah

sab baDe zoam se aae the nae surat-gar
sab ke daaman se vahi khvaab puraane nikle

main to us vaqt se Dartaa huun ki vo puchh na le
ye agar zabt kaa aansu hai to Tapkaa kaise

soyaa nahin main barson talak jis ke khauf se
vo khvaab ab bhi chashm-badar ho nahin rahaa

sab ne maanaa marne vaalaa dahshat-gard aur qaatil thaa
maan ne phir bhi qabr pe us ki raaj-dulaaraa likkhaa thaa

mustaqbil ke khauf se sahmaa rahtaa huun
main ne buDhe peD ki aankhein dekhi hain

maut bar-haq hai jab aa jaae hamein kyaa lekin
zindagi ham tiri raftaar se Dar jaate hain

mujh ko thi mahfilon ki bahut aarzu magar
tanhaaiyon ke khauf se tanhaa rahaa huun main