shikasta khvaab mire aaine mein rakkhe hain — Zubair Qaisar

tiraa javaab mire kaam kaa nahin hai ab
ki main to bhuul chukaa huun savaal vaise hi

ye nafsiyaati marizon kaa shahr hai 'qaisar'
koi savaal uThaaoge maare jaaoge

tiri tasvir uThaai hui hai
raushni khvaab mein aai hui hai

subh tak be-talab main jaagungaa
aaj to be-sabab main jaagungaa

main us ke jaal mein aaungaa dekhnaa 'qaisar'
vo mujh ko dhoke se ghar mein bulaa ke maaregaa

mere khvaabon ke jharokon ko sajaate rahiye
na sahi vasl magar yaad to aate rahiye

afsos umr kaT gai ranj-o-malaal mein
dekhaa na khvaab mein bhi jo kuchh thaa khayaal mein

balaa-e-jaan thi jo bazm-e-tamaashaa chhoD di main ne
khushaa ai zindagi khvaabon ki duniyaa chhoD di main ne

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

kis ajab saaat-e-naayaab mein aayaa huaa huun
tujh se milne main tire khvaab mein aayaa huaa huun

khvaab kyaa us kaa bunaa main ruuh tak tar ho gayaa
ek qatra is qadar phailaa samundar ho gayaa