Ghazal

"kisi se khush hai kisi se khafaa khafaa saa hai vo shahr mein abhi shaayad nayaa nayaa saa hai na jaane kitne badan vo pahan ke leTaa hai bahut qarib hai phir bhi chhupaa chhupaa saa hai sulagtaa shahr nadi khuun kab ki baatein hain kahin kahin se ye qissa sunaa sunaa saa hai saron ke siing to jangal ki den hote hain vo aadmi to hai lekin Daraa Daraa saa hai kuchh aur dhuup to ho os suukh jaane tak vo peD ab ke baras bhi haraa haraa saa hai"

"hue sab ke jahaan mein ek jab apnaa jahaan aur ham musalsal laDte rahte hain zamin-o-aasmaan aur ham kabhi aakaash ke taare zamin par bolte bhi the kabhi aisaa bhi thaa jab saath thiin tanhaaiyaan aur ham sabhi ik dusre ke dukh mein sukh mein rote hanste the kabhi the ek ghar ke chaand suraj naddiyaan aur ham moarrikh ki qalam ke chand lafzon si hai ye duniyaa badalti hai har ik yug mein hamaari daastaan aur ham darakhton ko haraa rakhne ke zimmedaar the donon jo sach puchho baraabar ke hain mujrim baaghbaan aur ham"

"phir goyaa hui shaam parindon ki zabaani aao sunein miTTi se hi miTTi ki kahaani vaaqif nahin ab koi samundar ki zabaan se sadiyon ki masaafat ko sunaataa to hai paani utre koi mahtaab ki kashti ho tah-e-aab dariyaa mein badalti nahin dariyaa ki ravaani kahtaa hai koi kuchh to samajhtaa hai koi kuchh lafzon se judaa ho gae lafzon ke maaani is baar to donon the nai raahon ke raahi kuchh duur hi hamraah chalein yaadein puraani"

"yuun lag rahaa hai jaise koi aas-paas hai vo kaun hai jo hai bhi nahin aur udaas hai mumkin hai likhne vaale ko bhi ye khabar na ho qisse mein jo nahin hai vahi baat khaas hai maane na maane koi haqiqat to hai yahi charkha hai jis ke paas usi ki kapaas hai itnaa bhi ban-sanvar ke na niklaa kare koi lagtaa hai har libaas mein vo be-libaas hai chhoTaa baDaa hai paani khud apne hisaab se utni hi har nadi hai yahaan jitni pyaas hai"

"us ke dushman hain bahut aadmi achchhaa hogaa vo bhi meri hi tarah shahr mein tanhaa hogaa itnaa sach bol ki honTon kaa tabassum na bujhe raushni khatm na kar aage andheraa hogaa pyaas jis nahr se Takraai vo banjar nikli jis ko pichhe kahin chhoD aae vo dariyaa hogaa mire baare mein koi raae to hogi us ki us ne mujh ko bhi kabhi toD ke dekhaa hogaa ek mahfil mein kai mahfilein hoti hain sharik jis ko bhi paas se dekhoge akelaa hogaa"

"main apne ikhtiyaar mein huun bhi nahin bhi huun duniyaa ke kaarobaar mein huun bhi nahin bhi huun teri hi justuju mein lagaa hai kabhi kabhi main tere intizaar mein huun bhi nahin bhi huun fihrist marne vaalon ki qaatil ke paas hai main apne hi mazaar mein huun bhi nahin bhi huun auron ke saath aisaa koi masala nahin ik main hi is dayaar mein huun bhi nahin bhi huun mujh se hi hai har ek siyaasat kaa e'tibaar phir bhi kisi shumaar mein huun bhi nahin bhi huun"

"safar ko jab bhi kisi daastaan mein rakhnaa qadam yaqin mein manzil gumaan mein rakhnaa jo saath hai vahi ghar kaa nasib hai lekin jo kho gayaa hai use bhi makaan mein rakhnaa jo dekhti hain nigaahein vahi nahin sab kuchh ye ehtiyaat bhi apne bayaan mein rakhaa vo ek khvaab jo chehra kabhi nahin bantaa banaa ke chaand use aasmaan mein rakhnaa chamakte chaand-sitaaron kaa kyaa bharosa hai zamin ki dhuul bhi apni uDaan mein rakhnaa"

"koi kisi ki taraf hai koi kisi ki taraf kahaan hai shahr mein ab koi zindagi ki taraf sabhi ki nazron mein ghaaeb thaa jo vo haazir thaa kisi ne ruk ke nahin dekhaa aadmi ki taraf tamaam shahr ki shamein usi se raushan thiin kabhi ujaalaa bahut thaa kisi gali ki taraf kahin ki bhuuk ho har khet us kaa apnaa hai kahin ki pyaas ho jaaegi vo nadi ki taraf na nikle khair se allaama qaul se baahar 'yagaanaa' TuuT gae jab chale khudi ki taraf"

"jahaan na teri mahak ho udhar na jaaun main miri sarisht safar hai guzar na jaaun main mire badan mein khule jangalon ki miTTi hai mujhe sanbhaal ke rakhnaa bikhar na jaaun main mire mizaaj mein be-maa'ni uljhanein hain bahut mujhe udhar se bulaanaa jidhar na jaaun main kahin pukaar na le gahri vaadiyon kaa sukut kisi maqaam pe aa kar Thahar na jaaun main na jaane kaun se lamhe ki bad-du'aa hai ye qarib ghar ke rahun aur ghar na jaaun main"

"ab khushi hai na koi dard rulaane vaalaa ham ne apnaa liyaa har rang zamaane vaalaa ek be-chehra si ummid hai chehra chehra jis taraf dekhiye aane ko hai aane vaalaa us ko rukhsat to kiyaa thaa mujhe maalum na thaa saaraa ghar le gayaa ghar chhoD ke jaane vaalaa duur ke chaand ko DhunDo na kisi aanchal mein ye ujaalaa nahin aangan mein samaane vaalaa ik musaafir ke safar jaisi hai sab ki duniyaa koi jaldi mein koi der se jaane vaalaa"

"duaa salaam mein lipTi zaruratein maange qadam qadam pe ye basti tijaaratein maange kahaan har ek ko aati hai raas barbaadi nae safar ki masaafat zihaanatein maange chamakte kapDe mahaktaa khulus pukhta makaan har ek bazm mein izzat hifaazatein maange koi dhamaakaa koi chikh koi hangaama lahu badan kaa lahu ki shabaahatein maange koi na ho mire tire alaava basti mein kabhi kabhi yahi jazba riqaabatein maange"

"us ko kho dene kaa ehsaas to kam baaqi hai jo huaa vo na huaa hotaa ye gham baaqi hai ab na vo chhat hai na vo ziina na angur ki bel sirf ik us ko bhulaane ki qasam baaqi hai main ne puchhaa thaa sabab peD ke gir jaane kaa uTh ke maali ne kahaa us ki qalam baaqi hai jang ke faisle maidaan mein kahaan hote hain jab talak haafize baaqi hain alam baaqi hai thak ke girtaa hai hiran sirf shikaari ke liye jism ghaayal hai magar aankhon mein ram baaqi hai"

"achchhi nahin ye khaamushi shikva karo gila karo yuun bhi na kar sako to phir ghar mein khudaa khudaa karo shohrat bhi us ke saath hai daulat bhi us ke haath hai khud se bhi vo mile kabhi us ke liye duaa karo dekho ye shahr hai ajab dil bhi nahin hai kam ghazab shaam ko ghar jo aauun main thoDaa saa saj liyaa karo dil mein jise basaao tum chaand use banaao tum vo jo kahe paDhaa karo jo na kahe sunaa karo meri nashist pe bhi kal aaegaa koi dusraa tum bhi banaa ke raasta mere liye jagah karo"

"zihaanaton ko kahaan karb se faraar milaa jise nigaah mili us ko intizaar milaa vo koi raah kaa patthar ho yaa hasin manzar jahaan bhi raasta Thahraa vahin mazaar milaa koi pukaar rahaa thaa khuli fazaaon se nazar uThaai to chaaron taraf hisaar milaa har ek saans na jaane thi justuju kis ki har ik dayaar musaafir ko be-dayaar milaa ye shahr hai ki numaaish lagi hui hai koi jo aadmi bhi milaa ban ke ishtihaar milaa"

"kaalaa ambar piili dharti yaa allaah haa-haa he-he hi-hi-hi-hi yaa allaah kargil aur kashmir hi tere naam hon kyuun bhaai bahan mahbuba beTi yaa allaah piir payambar ko ab aur na zahmat de chulhaa chakki roTi sabzi yaa allaah ghi misri bhi bhej kabhi akhbaaron mein kai dinon se chaae hai kaDvi yaa allaah tu hi phuul sitaaraa saavan hariyaali aur kabhi tu nagasaki yaa allaah"

"meri teri duriyaan hain ab ibaadat ke khilaaf har taraf hai fauj-aaraai mohabbat ke khilaaf harf-e-sarmad khun-e-daaraa ke alaava shahr mein kaun hai jo sar uThaae baadshaahat ke khilaaf pahle jaisaa hi dukhi hai aaj bhi buDhaa kabir koi aayat kaa mukhaalif koi murat ke khilaaf main bhi chup huun tu bhi chup hai baat ye sach hai magar ho rahaa hai jo bhi vo to hai tabiat ke khilaaf muddaton ke baad dekhaa thaa use achchhaa lagaa der tak hanstaa rahaa vo apni aadat ke khilaaf"

"balaa vo Tal gai sadqe mein jis ke shahr chaDhe hamein Dubo ke na ab koi khuni nahr chaDhe baDhaa jo main thake qadmon ne bad-du’aa ye di qadam qadam tujhe pagDanDiyon kaa zahr chaDhe vahi milan kaa samaan us se maanjhiyo hogaa nadi mein chaand ki jab naav lahr-lahr chaDhe khudaa kare tiraa tan-man rahe yunhi ujlaa na tere gaanv pe gard-e-havaa-e-shahr chaDhe Dhakun badan to gae mausamon ki bu mahke badan ko kholun to bhigi ruton kaa zahr chaDhe banaa vo chaand musavvir to us pe qaid lagi na ab makaanon ki chhat par vo jaan-e-dahr chaDhe"

"har chamakti qurbat mein ek faasla dekhun kaun aane vaalaa hai kis kaa raasta dekhun shaam kaa dhundlakaa hai yaa udaas mamtaa hai bhuli-bisri yaadon se phuTti duaa dekhun masjidon mein sajdon ki mishalein huiin raushan be-charaagh galiyon mein kheltaa khudaa dekhun lahr lahr paani mein Dubtaa huaa suraj kaun mujh mein dar aayaa uTh ke aainaa dekhun lahlahaate mausam mein teraa zikr-e-shaadaabi shaakh shaakh par tere naam ko haraa dekhun"

"har ik rasta andheron mein ghiraa hai mohabbat ik zaruri haadisa hai garajti aandhiyaan zaaea hui hain zamin pe TuuT ke aansu giraa hai nikal aae kidhar manzil ki dhun mein yahaan to raasta hi raasta hai duaa ke haath patthar ho gae hain khudaa har zehn mein TuuTaa paDaa hai tumhaaraa tajraba shaayad alag ho mujhe to ilm ne bhaTkaa diyaa hai"

"kuchh bhi bachaa na kahne ko har baat ho gai aao kahin sharaab piyein raat ho gai phir yuun huaa ki vaqt kaa paansa palaT gayaa ummid jiit ki thi magar maat ho gai suraj ko chonch mein liye murghaa khaDaa rahaa khiDki ke parde khinch diye raat ho gai vo aadmi thaa kitnaa bhalaa kitnaa pur-khulus us se bhi aaj liije mulaaqaat ho gai raste mein vo milaa thaa main bach kar guzar gayaa us ki phaTi qamis mire saath ho gai naqsha uThaa ke koi nayaa shahr DhunDhiye is shahr mein to sab se mulaaqaat ho gai"

"teraa sach hai tire azaabon mein jhuuT likkhaa hai sab kitaabon mein ek se mil ke sab se mil liije aaj har shakhs hai naqaabon mein teraa milnaa tiraa nahin milnaa ek rasta kai saraabon mein un ki naakaamiyon ko bhi giniye jin ki shohrat hai kaamyaabon mein raushni thi savaal ki had tak har nazar kho gai javaabon mein"

"ye na puchho ki vaaqia kyaa hai kis ki nazron kaa zaaviya kyaa hai sab hain masruf kaun batlaae aadmi kaa ataa-pataa kyaa hai chaltaa jaataa hai kaarvaan-e-hayaat ibtidaa kyaa hai intihaa kyaa hai jo kitaabon mein hai vo sab kaa hai tu bataa teraa tajraba kyaa hai kaun rukhsat huaa khudaai se har taraf ye khudaa khudaa kyaa hai"

"apnaa gham le ke kahin aur na jaayaa jaae ghar mein bikhri hui chizon ko sajaayaa jaae jin charaaghon ko havaaon kaa koi khauf nahin un charaaghon ko havaaon se bachaayaa jaae khud-kushi karne ki himmat nahin hoti sab mein aur kuchh din abhi auron ko sataayaa jaae baagh mein jaane ke aadaab huaa karte hain kisi titli ko na phulon se uDaayaa jaae kyaa huaa shahr ko kuchh bhi to dikhaai de kahin yuun kiyaa jaae kabhi khud ko rulaayaa jaae ghar se masjid hai bahut duur chalo yuun kar lein kisi rote hue bachche ko hansaayaa jaae"

"man bai-raagi tan anuraagi qadam qadam dushvaari hai jivan jiinaa sahl na jaano bahut baDi fankaari hai auron jaise ho kar bhi ham baa-izzat hain basti mein kuchh logon kaa sidhaa-pan hai kuchh apni ayyaari hai jab jab mausam jhumaa ham ne kapDe phaaDe shor kiyaa har mausam shaaista rahnaa kori duniyaa-daari hai aib nahin hai is mein koi laal-pari naa phul-kali ye mat puchho vo achchhaa hai yaa achchhi naadaari hai jo chehra dekhaa vo toDaa nagar nagar viraan kiye pahle auron se naa-khush the ab khud se be-zaari hai"