Ghazal

"zamin chhoD kar main kidhar jaaungaa andheron ke andar utar jaaungaa miri pattiyaan saari sukhi huiin nae mausamon mein bikhar jaaungaa agar aa gayaa aaina saamne to apne hi chehre se Dar jaaungaa vo ik aankh jo meri apni bhi hai na aai nazar to kidhar jaaungaa vo ik shakhs aavaaz degaa agar main khaali saDak par Thahar jaaungaa palaT kar na paayaa kisi ko agar to apni hi aahaT se Dar jaaungaa tiri zaat mein saans li hai sadaa tujhe chhoD kar main kidhar jaaungaa"

"pahlu ke aar-paar guzartaa huaa saa ho ik shakhs aaine mein utartaa huaa saa ho jiitaa huaa saa ho kabhi martaa huaa saa ho ik shahr apne aap se Dartaa huaa saa ho saare kabira aap hi kartaa huaa saa ho ilzaam dusre hi pe dhartaa huaa saa ho har ik nayaa khayaal jo Tapke hai zehn se yuun lag rahaa hai jaise ki bartaa huaa saa ho qailula kar rahe hon kisi niim ke tale maidaan mein rakhsh-e-umr bhi chartaa huaa saa ho maashuq aisaa DhunDiye qahtur-rijaal mein har baat mein agartaa magartaa huaa saa ho phir baad mein vo qatl bhi kar de to harj kyaa lekin vo pahle pyaar bhi kartaa huaa saa ho gar daad tu na de na sahi gaaliyaan sahi apnaa bhi koi aib hunartaa huaa saa ho"

"jo chiiz thi kamre mein vo be-rabt paDi thi tanhaai-e-shab band-e-qabaa khol rahi thi aavaaz ki divaar bhi chup-chaap khaDi thi khiDki se jo dekhaa to gali uungh rahi thi baalon ne tiraa lams to mahsus kiyaa thaa lekin ye khabar dil ne baDi der se di thi haathon mein nayaa chaand paDaa haanp rahaa thaa raanon pe barahna si nami reing rahi thi yaadon ne use toD diyaa maar ke patthar aaine ki khandaq mein jo parchhaain paDi thi duniyaa ki guzarte hue paDti thiin nigaahein shishe ki jagah khiDki mein rusvaai jaDi thi TuuTi hui mehraab se gumbad ke khanDar tak ik buDhe moazzin ki sadaa guunj rahi thi"

"har khvaab kaali raat ke saanche mein Dhaal kar ye kaun chhup gayaa hai sitaare uchhaal kar aaise Dare hue hain zamaane ki chaal se ghar mein bhi paanv rakhte hain ham to sambhaal kar khaana-kharaabiyon mein tiraa bhi pata nahin tujh ko bhi kyaa milaa hamein ghar se nikaal kar jhulsaa gayaa hai kaaghzi chehron ki daastaan jalti hui khamoshiyaan lafzon mein Dhaal kar ye phuul khud hi suukh kar aaeinge khaak par tu apne haath se na inhein paaemaal kar"

"phir kisi khvaab ke parde se pukaaraa jaaun phir kisi yaad ki talvaar se maaraa jaaun phir koi vusat-e-aafaaq pe saaya Daale phir kisi aankh ke nuqte mein utaaraa jaaun din ke hangaamon mein daaman kahin mailaa ho jaae raat ki nuqrai aatish mein nikhaaraa jaaun khushk khoe hue gumnaam jazire ki tarah dard ke kaale samundar se ubhaaraa jaaun apni khoi hui jannat kaa talabgaar banun dast-e-yazdaan se gunahgaar sanvaaraa jaaun"

"saDkon par suraj utraa saaya saaya TuuT gayaa jab gul kaa siina chiraa khushbu kaa kaanTaa niklaa tu kis ke kamre mein thi main tere kamre mein thaa khiDki ne aankhein kholi darvaaze kaa dil dhaDkaa dil ki andhi khandaq mein khvaahish kaa taaraa TuuTaa jism ke kaale jangal mein lazzat kaa chitaa lapkaa phir baalon mein raat hui phir haathon mein chaand khilaa"

"ek qatra ashk kaa chhalkaa to dariyaa kar diyaa ek musht-e-khaak jo bikhri to sahraa kar diyaa mere TuuTe hausle ke par nikalte dekh kar us ne divaaron ko apni aur unchaa kar diyaa vaardaat-e-qalb likkhi ham ne farzi naam se aur haathon-haath us ko khud hi le jaa kar diyaa us ki naaraazi kaa suraj jab savaa neze pe thaa apne harf-e-ijz hi ne sar pe saaya kar diyaa duniyaa bhar ki khaak koi chhaantaa phirtaa hai ab aap ne dar se uThaa kar kaisaa rusvaa kar diyaa ab na koi khauf dil mein aur na aankhon mein umiid tu ne marg-e-naa-gahaan bimaar achchhaa kar diyaa bhuul jaa ye kal tire naqsh-e-qadam the chaand par dekh un haathon ko kis ne aaj kaasa kar diyaa ham to kahne jaa rahe the hamza-e-ye vassalaam biich mein us ne achaanak nun-ghunna kar diyaa ham ko gaali ke liye bhi lab hilaa sakte nahin ghair ko bosa diyaa to munh se dikhlaa kar diyaa tirgi ki bhi koi had hoti hai aakhir miyaan surkh parcham ko jalaa kar hi ujaalaa kar diyaa bazm mein ahl-e-sukhan taqtia farmaate rahe aur ham ne apne dil kaa bojh halkaa kar diyaa jaane kis ke muntazir baiThe hain jhaaDu pher kar dil se har khvaahish ko 'aadil' ham ne chaltaa kar diyaa"

"gaanThi hai us ne dosti ik pesh-imaam se 'aadil' uThaa lo haath duaa-o-salaam se paani ne raasta na diyaa jaan-bujh kar ghote lagaae phir bhi rahe tishna-kaam se main us gali se sar ko jhukaae guzar gayaa chilghoze pheinkti rahi vo mujh pe baam se vo kaun thaa jo din ke ujaale mein kho gayaa ye chaand kis ko DhunDne niklaa hai shaam se kone mein baadshaah paDaa unghtaa rahaa Table pe raat kaT gai begam ghulaam se nashsha saa Doltaa hai tire ang ang par jaise abhi bhigo ke nikaalaa ho jaam se"

"jiitaa hai sirf tere liye kaun mar ke dekh ik roz meri jaan ye harkat bhi kar ke dekh manzil yahin hai aam ke peDon ki chhaanv mein ai shahsavaar ghoDe se niche utar ke dekh TuuTe paDe hain kitne ujaalon ke ustukhvaan saaya-numaa andhere ke andar utar ke dekh phulon ki tang-daamani kaa tazkira na kar khushbu ki tarah mauj-e-sabaa mein bikhar ke dekh tujh par khuleinge maut ki sarhad ke raaste himmat agar hai us ki gali se guzar ke dekh dariyaa ki vusaton se use naapte nahin tanhaai kitni gahri hai ik jaam bhar ke dekh"

"vusat-e-daaman-e-sahraa dekhun apni aavaaz ko phailaa dekhun haath mein chaand ko pighlaa dekhun khvaab dekhun ki kharaaba dekhun sath par aks ko bahtaa dekhun dariyaa dariyaa tiraa saaya dekhun khud ko dekhun tiraa chehra dekhun aaina toD duun phir kyaa dekhun apne saae ko barahna paaun saath rusvaai ko hanstaa dekhun retili dhuup mein aate jaate mahmil-e-vaqt ko Thahraa dekhun subh ke phuul ko hanstaa paa kar raat ki aankh mein kaanTaa dekhun shahr mein log jise DhunDte hain apne ghar mein use baiThaa dekhun aisaa din aae na hargiz 'aadil' jaise ji mein use martaa dekhun"

"jalne lage khalaa mein havaaon ke naqsh-e-paa suraj kaa haath shaam ki gardan pe jaa paDaa chhat par pighal ke jam gai khvaabon ki chaandni kamre kaa dard haanpte saayon ko khaa gayaa bistar mein ek chaand taraashaa thaa lams ne us ne uThaa ke chaae ke cup mein Dubo diyaa har aankh mein thi TuTte lamhon ki tishnagi har jism pe thaa vaqt kaa saaya paDaa huaa dekhaa thaa sab ne Dubne vaale ko duur duur paani ki ungliyon ne kinaare ko chhu liyaa aaegi raat munh pe siyaahi male hue rakh degaa din bhi haath mein kaaghaz phaTaa huaa"

"vo ghar chhoD kar jaa rahaa hai suno khudaa ke liye koi to rok lo khule sar pareshaan saDkon pe vo kise DhunDhtaa hai zaraa puchh lo kahin kho na jaae vo is bhiiD mein lapak kar zaraa us ko aavaaz do ye shoale ugalti hui dopahar jalaa degi us ke har ik khvaab ko vo lamhon ki chalti hui barchhiyaan usi samt baDhtaa hai vo shakhs to"

"aadhon ki taraf se kabhi paunon ki taraf se aavaaze kase jaate hain baunon ki taraf se hairat se sabhi khaak-zada dekh rahe hain har roz zamin ghaTti hai konon ki taraf se aankhon mein liye phirte hain is dar-badari mein kuchh TuuTe hue khvaab khilaunon ki taraf se phir koi asaa de ki vo phunkaarte nikle phir azhdahe firaun ke Tonon ki taraf se tu vahm-o-gumaan se bhi pare detaa hai sab ko ho jaataa hai pal bhar mein na honon ki taraf se baaton kaa koi silsila jaari ho kisi taur khaamoshi hi khaamoshi hai donon ki taraf se phir baad mein darvaaza dikhaa dete hain 'aadil' pahle vo uThaate hain bichhaunon ki taraf se"

"darvaaza band dekh ke mere makaan kaa jhonkaa havaa kaa khiDki ke parde hilaa gayaa vo jaan-e-nau-bahaar jidhar se guzar gayaa peDon ne phuul patton se rasta chhupaa liyaa us ke qarib jaane kaa anjaam ye huaa main apne-aap se bhi bahut duur jaa paDaa angDaai le rahi thi gulistaan mein jab bahaar har phuul apne rang ki aatish mein jal gayaa kaanTe se TuTte hain mire ang ang mein rag rag mein chaand jaltaa huaa zahr bhar gayaa aankhon ne us ko dekhaa nahin is ke baavajud dil us ki yaad se kabhi ghaafil nahin rahaa darvaaza khaTkhaTaa ke sitaare chale gae khvaabon ki shaal oDh ke main unghtaa rahaa shab chaandni ki aanch mein tap kar nikhar gai suraj ki jalti aag mein din khaak ho gayaa saDkein tamaam dhuup se angaara ho gaiin andhi havaaein chalti hain in par barahna-paa vo aae thoDi der ruke aur chale gae 'aadil' main sar jhukaae hue chup khaDaa rahaa"

"paani ko patthar kahte hain kyaa kuchh dida-var kahte hain khush-fahmi ki had hoti hain khud ko daanish-var kahte hain kaun lagi-lipTi rakhtaa hai ham tere munh par kahte hain Thiik hi kahte honge phir to jab ye professor kahte hain sab un ko andar samjhe the vo khud ko baahar kahte hain teraa is mein kyaa jaataa hai apne khanDar ko ghar kahte hain nazm samajh mein kab aati hai dekh is ko mantar kahte hain"

"na koi rok sakaa khvaab ke safiron ko udaas kar gae nindon ke raahgiron ko vo mauj ban ke uThi yaad ke samundar se tabaah kar gai tanhaai ke jaziron ko laraz ke TuuT gaiin haft-rang divaarein havaa chali to rihaai mili asiron ko dafine paanv tale se guzar gae kitne main dekhtaa hi rahaa haath mein lakiron ko"

"chehre pe chamchamaati hui dhuup mar gai suraj ko Dhaltaa dekh ke phir shaam Dar gai mabhut se khaDe rahe sab bas ki line mein kulhe uchhaalti hui bijli guzar gai suraj vahi thaa dhuup vahi shahr bhi vahi kyaa chiiz thi jo jism ke andar ThiThar gai khvaahish sukhaane rakkhi thi koThe pe dopahar ab shaam ho chali miyaan dekho kidhar gai tahlil ho gai hai havaa mein udaasiyaan khaali jagah jo rah gai tanhaai bhar gai chehre baghair niklaa thaa us ke makaan se rusvaaiyon ki had se bhi aage khabar gai rangon ki surkh naaf daakhiliyaa gul-aaftaab andhi havaaein khaar khaTak kaan bhar gai"

"hone ko yuun to shahr mein apnaa makaan thaa nafrat kaa regzaar magar darmiyaan thaa lamhe ke TuTne ki sadaa sun rahaa thaa main jhapki jo aankh sar pe nayaa aasmaan thaa kahne ko haath baandhe khaDe the namaaz mein puchho to dusri hi taraf apnaa dhyaan thaa allaah jaane kis pe akaDtaa thaa raat din kuchh bhi nahin thaa phir bhi baDaa bad-zabaan thaa shole ugalte tiir baraste the charkh se saaya thaa paas mein na koi saaebaan thaa sab se kiyaa hai vasl kaa vaada alag alag kal raat vo sabhi pe bahut mehrbaan thaa munh-phaT thaa be-lagaam thaa rusvaa thaa DhiiT thaa jaisaa bhi thaa vo dosto mahfil ki jaan thaa"

"bhuul kar bhi na phir milegaa tu jaantaa huun yahi karegaa tu dekh aage muhib khaai hai lauT aa varna gir paDegaa tu dil ki takhti pe naam hai teraa yaan nahin to kahaan rahegaa tu mere aangan mein ek paudaa hai phuul ban ke mahak uThegaa tu raaste mein kai dukaanein hain har dukaan par dikhaai degaa tu main ne aankhon se jeb bhar li hai dekhtaa huun kahaan chhupegaa tu khush rakheingi ye duriyaan tujh ko kyaa yuun hi muskuraa sakegaa tu"

"mujhe pasand nahin aise kaarobaar mein huun ye jabr hai ki main khud apne ikhtiyaar mein huun hudud-e-vaqt se baahar ajab hisaar mein huun main ek lamha huun sadiyon ke intizaar mein huun abhi na kar miri tashkil mujh ko naam na de tire vajud se baahar mein kis shumaar mein huun main ek zarra miri haisiyat hi kyaa hai magar havaa ke saath huun uDte hue ghubaar mein huun bas aas-paas ye suraj hai aur kuchh bhi nahin mahak rahaa to huun lekin main regzaar mein huun"

"badan par nai fasl aane lagi havaa dil mein khvaahish jagaane lagi koi khud-kushi ki taraf chal diyaa udaasi ki mehnat Thikaane lagi jo chup-chaap rahti thi divaar par vo tasvir baatein banaane lagi khayaalon ke taarik khanDaraat mein khamoshi ghazal gungunaane lagi zaraa der baiThe the tanhaai mein tiri yaad aankhein dukhaane lagi"

"aashiq the shahr mein jo puraane sharaab ke hain un ke dil mein vasvase ab ehtisaab ke vo jo tumhaare haath se aa kar nikal gayaa ham bhi qatil hain usi khaana-kharaab ke phulon ki sej par zaraa aaraam kyaa kiyaa us gul-badan pe naqsh uTh aae gulaab ke soe to dil mein ek jahaan jaagne lagaa jaage to apni aankh mein jaale the khvaab ke bas tishnagi ki aankh se dekhaa karo unhein dariyaa ravaan-davaan hain chamakte saraab ke okaaDa itni duur na hotaa to ek din bhar laate saans saans mein gul aaftaab ke kis tarah jama kijiye ab apne aap ko kaaghaz bikhar rahe hain puraani kitaab ke"

"iblaagh ke badan mein tajassus kaa silsila TuuTaa hai chashm-e-khvaab mein hairat kaa aaina jo aasmaan ban ke musallat saron pe thaa kis ne use zamin ke andar dhansaa diyaa bikhri hain piili ret pe suraj ki haDDiyaan zarron ke intizaar mein lamhon kaa jhumnaa ehraam TuTte hain kahaan sang-e-vaqt ke sahraa ki tishnagi mein abul-haul hans paDaa ungli se us ke jism pe likkhaa usi kaa naam phir batti band kar ke use DhunDtaa rahaa shiryaanein khinch ke TuuT na jaaein tanaav se miTTi pe khul na jaae ye darvaaza khuun kaa maujein thiin shoalagi ke samundar mein tund-o-tez main raat bhar ubhartaa rahaa Dubtaa rahaa alfaaz ki ragon se maaani nichoD le faasid mavaad kaaghzi ghoDe pe Daal aa"

"ye phailti shikastagi ehsaas ki taraf dariyaa ravaan-davaan hain miri pyaas ki taraf us kaa badan jhukaa huaa patthar ki bench par apne qadam bhi muDte hue ghaas ki taraf dikhlaa rahi hai dhuup bashaashat kaa aaina aur chhaanv khinchti hai mujhe yaas ki taraf ashiyaa ki lazzaton mein aTaktaa huaa badan aur ruuh kaa khinchaav hai ban-baas ki taraf sab ye samajh rahe the ki nirvaan mil gayaa chakraa rahi hai chiil magar maas ki taraf"