Ghazal

"hone kaa e'tibaar nahin kar rahe hain log ab khud ko ikhtiyaar nahin kar rahe hain log ab ishq aur dasht khasaare mein hain miyaan ab dil kaa kaarobaar nahin kar rahe hain log tayyaar hai tamaashaa dikhaane ko ek shakhs maahaul saazgaar nahin kar rahe hain log ab hai nizaam-e-ishq mein tarmim kaa chalan taaron kaa bhi shumaar nahin kar rahe hain log hairaan huun ki itni riyaazat ke baavajud kyuun vaqt ko ghubaar nahin kar rahe hain log khush huun ki aasmaan se hai qaaem zamin kaa rabt dukh hai ki paaedaar nahin kar rahe hain log shaayad ki meri maut kaa elaan ho chukaa ab mujh pe koi vaar nahin kar rahe hain log aage ki dauD mein hue mahdud is tarah maazi pe eqtidaar nahin kar rahe hain log ai yaar apne husn pe kuchh khaak Daal de ab ishq ikhtiyaar nahin kar rahe hain log ab nisf shab nikalte hain be-khauf kaam par suraj kaa intizaar nahin kar rahe hain log"

"mire liye to ye bekaar hone vaalaa hai ye dil ki dard se bezaar hone vaalaa hai main us se khvaab ke raste pe milne aayaa huun magar vo niind se bedaar hone vaalaa hai jo faisla sar-e-darbaar hone vaalaa thaa vo faisla pas-e-divaar hone vaalaa hai sunaa hai yusuf-e-saani vahaan nahin aayaa sunaa hai khatm vo baazaar hone vaalaa hai vo jis ke haath se qisse ne maut paai hai sunaa hai saahab-e-kirdaar hone vaalaa hai"

"nahin jaati agar ye aasmaan tak to phir is chikh ki had hai kahaan tak chalo paani se vo shoala nikaalein uThaae jo zamin ko aasmaan tak ab agle moD par paataal hogaa yaqin se aa gayaa huun main gumaan tak zamaane ko samajh paayaa nahin huun main samjhaataa rahun khud ko kahaan tak ajab ik khel khelaa jaa rahaa hai na thaa jis kaa hamein koi gumaan tak bahut hi khubsurat raasta hai jo sidhaa jaa rahaa hai raaegaan tak zamin ke baab mein kuchh mashvare hain zaraa main jaa rahaa huun aasmaan tak"

"ham khaak-ba-sar gard-e-safar DhunD rahe hain aur log samajhte hain ki ghar DhunD rahe hain divaanon ke maanind mare shahr ke sab log dastaar ke qaabil koi sar DhunD rahe hain ab shaam hai to shahr mein gaanv ke parinde rahne ke liye koi shajar DhunD rahe hain jo dil ke nihaan-khaanon mein rahtaa hai hamesha ye log use aaj kidhar DhunD rahe hain galiyon mein jo phirte hain ye maanus se chehre Dhalti hui tahzib ke ghar DhunD rahe hain afsurda se chehron pe baDi der se ham log ik khoyaa huaa dast-e-hunar DhunD rahe hain"

"main vo majnun ki ik sahraa hai mujh mein vo sahraa bhi bahut simTaa hai mujh mein mujhe khud se nikaalegaa vo aakhir ba-naam-e-ishq jo aayaa hai mujh mein tumhaari yaad ko kaise nikaalun ki baaqi kuchh nahin bachtaa hai mujh mein kisi ke barf se lahje ke haathon ajab shoala saa ik bhaDkaa hai mujh mein koi taaviz kaa paani pilaa do koi jaadugari kartaa hai mujh mein kamini ko khabar is ki nahin hai ki sar se paanv tak dhokaa hai mujh mein tumhaare baad ye dekhaa nahin hai na-jaane kaun ab rahtaa hai mujh mein tumhein meri zarurat bhi paDegi puraane shahr kaa naqsha hai mujh mein tumhaari samt hijrat kar chukaa hai kahaan 'ishaaq' ab rahtaa hai mujh mein"

"khvaab ne rakh liyaa fasaane mein tum ne taakhir ki jagaane mein is zamin ko falak banaane mein main bhi shaamil thaa ik zamaane mein tere kirdaar ko uThaane mein mujh ko marnaa paDaa fasaane mein kaam karte hain roz-o-shab saahab ham mohabbat ke kaar-khaane mein baam-o-dar dushmanon ke saathi the mujh ko divaar se lagaane mein ishq mein thoDi si suhulat thi hazrat-e-qais ke zamaane mein din-o-duniyaa se jaanaa paDtaa hai dil ko divaangi banaane mein vaqt hi har taraf rukaavaT hai laa-makaan se makaan banaane mein aag ke darmiyaan baiThe hain qissa-khvaani ke chaae-khaane mein maktab-e-ishq mein sabaq paDhne log aaeinge har zamaane mein"

"apnaa hi kirdaar rad kartaa huaa main kahaani mustanad kartaa huaa ik nayaa naqsha banaa laayaa huun main shahr ko sahraa ki had kartaa huaa sharh dil ki likh rahaa huun main nai har puraani soch rad kartaa huaa ishq likkhegaa nae eraab ab mere dil ko shadd-o-mad kartaa huaa is tarah se mustanad hotaa gayaa ik qalandar khud ko rad kartaa huaa aur phir divaar mein dar ho gayaa ishq yuun meri madad kartaa huaa"

"main khaali ghar mein bhi tanhaa nahin thaa ki jab tak aaina TuuTaa nahin thaa sar-e-aaina vo chehra nahin thaa magar ye baat main samjhaa nahin thaa jahaan sairaab hoti thi miri ruuh vo sahraa thaa koi dariyaa nahin thaa mujhe us moD pe maaraa gayaa hai kahaani mein jahaan marnaa nahin thaa miri aankhon ne vo aansu bhi dekhaa miri qismat mein jo likkhaa nahin thaa hui thi zindagi jab shahr mein gum kisi ko koi ranj is kaa nahin thaa"

"dusraa kinaaraa bhi be-vafaa kinaaraa hai ab to Duub jaanaa hi aakhiri sahaaraa hai main utar nahin saktaa dusre kinaare par dusraa kinaaraa to dusraa kinaaraa hai mujh pe ab mohabbat mein zahr piinaa vaajib hai main ne dil nahin haaraa hausla bhi haaraa hai aasmaan ki vusat mein jaane ab kahaan hogaa vo jo meri qismat kaa be-khabar sitaaraa hai vaqt ki adaalat kaa faisla yahi hai ab main bhi ik khasaaraa huun tu bhi ik khasaaraa hai dusre kinaare par ye khabar hui mujh ko vo to is kahaani mein tisraa kinaaraa hai main ne tere hisse ke ratjage bhi kaaTe hain main ne tere hisse kaa qarz bhi utaaraa hai"

"raaegaani kaa aariza hai mujhe zindagi ek haadisa hai mujhe is kharaabe se kab gila hai mujhe apnaa honaa hi masala hai mujhe zimni kirdaar huun kahaani kaa apni taqdir kaa pata hai mujhe mujh ko andar ki kuchh khabar hi nahin aur baahar kaa sab pata hai mujhe dasht mein shahr yaad aataa hai ishq kaa pahlaa tajraba hai mujhe vaqt kaa raaz jaanne se miyaan jaane ye kaun roktaa hai mujhe ek lamhe ko ruk ke sun le use a zamin tujh se jo gila hai mujhe meri hi aankh ke vasile se khvaab andar se dekhtaa hai mujhe kitne chehre uThaae phirtaa huun aaina phir bhi jaantaa hai mujhe ik khushi suud par mili thi kahin us kaa qarza utaarnaa hai mujhe yuun hi khaamosh main nahin baiThaa shor andar kaa Toktaa hai mujhe"

"miri hasti sazaa hone se pahle main mar jaataa baDaa hone se pahle hamaare saath uThtaa baiThtaa thaa vo ik banda khudaa hone se pahle vo qibla is gali se jaa chukaa thaa namaaz-e-dil adaa hone se pahle mohabbat ik musalsal haadisa thi hamaare be-vafaa hone se pahle main apni zaat se naa-aashnaa thaa khudaa se aashnaa hone se pahle khizaan mein phuul saa lagtaa thaa mujh ko vo patthar aainaa hone se pahle bahut mazbut si divaar thaa main kisi kaa raastaa hone se pahle"

"kaaghaz ke bane phuul jo gul-daan mein rakhnaa titli ki udaasi ko bhi imkaan mein rakhnaa main ishq huun aur meraa nahin koi Thikaana ai husn mujhe dida-e-hairaan mein rakhnaa shaayad main kisi aur zamaane mein bhi aauun mumkin to nahin hai magar imkaan mein rakhnaa ab markazi kirdaar tumhaaraa hai mire dost tum meri kahaani ko zaraa dhyaan mein rakhnaa ye raah-e-mohabbat to faqat band gali hai aasaan se raste ko bhi saamaan mein rakhnaa"

"andheri shab mein hamesha se ilm vaale log kitaab paDhte hue raushni banaate hain"

"is paar kaa ho ke bhi mein us paar gayaa huun ik ism ki barakat se kai baar gayaa huun khairaat mein de aayaa huun jiiti hui baazi duniyaa ye samajhti hai ki main haar gayaa huun thaame hue ik raushni ke haath ko har shab paani pe qadam rakh ke main us paar gayaa huun darvaaze ko auqaat mein laane ke liye main divaar ke andar se kai baar gayaa huun kyaa mere liye ek bhi kirdaar nahin thaa kyuun apni kahaani se main be-kaar gayaa huun mushkil hai tujhe aag ke dariyaa se bachaa luun ai shahr-e-peshawar main tujhe haar gayaa huun khvaabon ne jo ik khel banaayaa thaa mire dost is khel mein taabir se main haar gayaa huun"