vahshat ke is nagar mein vo qaus-e-quzah se log — Abbas Rizvi

kyaa karun khilat o dastaar ki khvaahish ki mujhe
ziist karne kaa saliqa bhi ziyaan se aayaa

vo habs thaa ki tarasti thi saans lene ko
so ruuh taaza hui jism se nikalte hi

talab karein to ye aankhein bhi in ko de duun main
magar ye log in aankhon ke khvaab maangte hain

ajiib turfa-tamaashaa hai mere ahd ke log
savaal karne se pahle javaab maangte hain

bahut aziiz thi ye zindagi magar ham log
kabhi kabhi to kisi aarzu mein mar bhi gae

khauf aisaa hai ki duniyaa ke sataae hue log
kabhi mimbar kabhi mehraab se Dar jaate hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kyon tasavvur mein ji rahaa huun main
jab haqiqat mein mar hi jaanaa hai

ijz-o-niyaaz apnaa apni taraf hai saaraa
is musht-e-khaak ko ham masjud jaante hain

na jaane us ne khule aasmaan mein kyaa dekhaa
parinda phir se jahaan-e-qafas mein lauT aayaa

suni ye baat to be-saakhta ik dil-jali boli
inhi ke saath rahnaa hai to phir jannat mein kyaa jaanaa

saaz ye kina-saaz kyaa jaanein
naaz vaale niyaaz kyaa jaanein