kaun mar kar dobaara zinda huaa — Abdul Aziz Khalid

har baat hai 'khaalid' ki zamaane se niraali
baashinda hai shaayad kisi duniyaa-e-digar kaa

nai mohabbatein 'khaalid' puraani dostiyaan
azaab-e-kashmakash-e-be-amaan mein rahte hain

pursaan-e-pareshaani-e-insaan nahin koi
qismat ki girah naakhun-e-tadbir se kholo

shahidaan-e-vafaa ki manqabat likhte rahe lekin
na ki arzi khudaaon ki kabhi hamd-o-sanaa ham ne

qaasid ye zabaan us ki bayaan us kaa nahin hai
dhokaa hai tujhe us ne kahaa aur hi kuchh hai

parakhne vaale parkheinge isi meaar par ham ko
jahaan se kyaa liyaa ham ne jahaan ko kyaa diyaa ham ne

hai ajab nizaam zakaat kaa mire mulk mein mire des mein
ise kaaTtaa koi aur hai ise baanTtaa koi aur hai

kin manzilon luTe hain mohabbat ke qaafile
insaan zamin pe aaj gharib-ul-vatan saa hai

malak-ul-maut moazzin hai miraa vasl ki raat
dam nikal jaataa hai jab vaqt-e-azaan aataa hai

leaderi chaaho to lafz-e-qaum hai mehmaan-navaaz
gap-navison ko aur ahl-e-mez ko raazi karo

kis tarah duur hon aalaam-e-gharib-ul-vatani
zindagi khud bhi gharib-ul-vatani hoti hai

aazaadi ki dhumein hain shohre hain taraqqi ke
har gaam hai paspaai har vaza ghulaamaana