apne vajud se pare ab — Abdullah Kamal

vo qayaamat thi ki reza reza ho ke uD gayaa
ai zamin varna kabhi ik aasmaan meraa bhi thaa

chamak de chaand ko ThanDak havaa ko dil ko umang
udaas qisse ko phir ek shaahzaada de

aao aaj ham donon apnaa apnaa ghar chun lein
tum navaah-e-dil le lo khitta-e-badan meraa

tum to ai khushbu havaao us se mil kar aa gaiin
ek ham the zakhm-e-tanhaai haraa karte rahe

main tujh ko jaagti aankhon se chhu sakun na kabhi
miri anaa kaa bharam rakh le mere khvaab mein aa

ik musalsal jang thi khud se ki ham zinda hain aaj
zindagi ham teraa haq yuun bhi adaa karte rahe

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

safar mein aise kai marhale bhi aate hain
har ek moD pe kuchh log chhuT jaate hain

yuun to maujud apne ghar mein hai
aadmi mustaqil safar mein hai

'amir' jaate ho but-khaane ki ziyaarat ko
paDegaa raah mein kaaba salaam kar lenaa

manzil apni DhunD rahe ho
rasta duuje kaa chalte ho