main tujh ko jaagti aankhon se chhu sakun na kabhi — Abdullah Kamal

vo qayaamat thi ki reza reza ho ke uD gayaa
ai zamin varna kabhi ik aasmaan meraa bhi thaa

chamak de chaand ko ThanDak havaa ko dil ko umang
udaas qisse ko phir ek shaahzaada de

aao aaj ham donon apnaa apnaa ghar chun lein
tum navaah-e-dil le lo khitta-e-badan meraa

tum to ai khushbu havaao us se mil kar aa gaiin
ek ham the zakhm-e-tanhaai haraa karte rahe

ik musalsal jang thi khud se ki ham zinda hain aaj
zindagi ham teraa haq yuun bhi adaa karte rahe

apne vajud se pare ab
koi bhi raasta nahin hai

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

aql kahti hai dobaara aazmaanaa jahl hai
dil ye kahtaa hai fareb-e-dost khaate jaaiye

us ko khonaa asl mein us ko paanaa hai
haasil kaa hi partav hai laa-haasil mein

zindagi sundar ghazal hai dosto
zindagi ko gungunaanaa chaahiye

yuun to qadam qadam pe hai divaar saamne
koi na ho to khud se ulajh jaanaa chaahiye