chaahein to is ko tegh-e-khamoshi se kaaT dein — Abhinandan Pandey

nasl-e-aadam rafta rafta khud ko kar legi tabaah
itni sakhti se qayaamat pesh aaegi na puchh

darmiyaan jo jism kaa parda hai kaise hogaa chaak
maut kis tarkib se ham ko milaaegi na puchh

khud-kushi kaa faisla ye soch kar ham ne kiyaa
kaun kartaa zindagi kaa maut se achchhaa ilaaj

ghaur se dekhte rahne ki sazaa paai hai
teri tasvir in aankhon mein utar aai hai

savaal aa gae aankhon se chhin ke honTon par
hamein javaab na dene kaa faaeda to milaa

jab yahaan rahne ke sab asbaab yakjaa kar liye
tab khulaa mujh par ki main duniyaa kaa baashinda na thaa

main baDaa ho gayaa huun magar bachpanaa
mere dil se kabhi bhi gayaa hi nahin

shaayad zabaan pe qarz thaa ham ne chukaa diyaa
khaamosh ho gae hain tujhe ham pukaar ke

fazaaein chup hain kuchh aisi ki dard boltaa hai
badan ke shor mein kis ko pukaarein kyaa maangein

baDi hasrat se insaan bachpane ko yaad kartaa hai
ye phal pak kar dobaara chaahtaa hai khaam ho jaae

tere kahne se chup nahin huun main
jaantaa huun ki bolnaa kab hai

aankhon mein hai kaisaa paani band hai kyuun aavaaz
apne dil se puchho jaanaan meri chup kaa raaz