mohabbat ne 'maail' kiyaa har kisi ko — Ahmad Husain Mail

musalmaan kaafiron mein huun musalmaanon mein kaafir huun
ki quraan sar pe but aankhon mein hai zunnaar pahlu mein

jitne achchhe hain main huun un mein buraa
hain bure jitne un mein achchhaa huun

tum ko maalum javaani kaa mazaa hai ki nahin
khvaab hi mein kabhi kuchh kaam huaa hai ki nahin

niind se uTh kar vo kahnaa yaad hai
tum ko kyaa sujhi ye aadhi raat ko

hai hukm-e-aam ishq alaihis-salaam kaa
puujo buton ko bhed kuchh in mein khudaa ke hain

naaz kar naaz tire naaz pe hai naaz mujhe
meri tanhaai hai partav tiri yaktaai kaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

ek bosa de ke vo bole maza aayaa nahin
ek bose mein rumuz-e-ishq khul jaaeinge kyaa

rumuz-e-ishq-o-mohabbat se aashnaa huun main
kisi ko gham-zada dekhaa to ro diyaa huun main

nikal gayaa miri aankhon se misl-e-khvaa-o-khayaal
guzar gayaa dil-e-raushan se vo nazar ban kar

ye dil kab ishq ke qaabil rahaa hai
kahaan is ko dimaagh o dil rahaa hai