mujhe manzur gar tark-e-ta'alluq hai razaa teri — Ahmad Nadeem Qasmi

aaghosh mein mahkoge dikhaai nahin doge
tum nikhat-e-gulzaar ho ham parda-e-shab hain

gham-e-jaanaan gham-e-dauraan ki taraf yuun aayaa
jaanib shahar chale dukhtar-e-dahqaan jaise

zindagi shama ki maanind jalaataa huun 'nadim'
bujh to jaaungaa magar subah to kar jaaungaa

kis tavaqqoa pe kisi ko dekhein
koi tum se bhi hasin kyaa hogaa

ik safina hai tiri yaad agar
ik samundar hai miri tanhaai

aakhir duaa karein bhi to kis muddaaa ke saath
kaise zamin ki baat kahein aasmaan se ham

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

samundar aasmaan is par sitaaron kaa safina
miraa mahtaab-e-gham hai be-karaani dekhne mein

koi halchal hai na aahaT na sadaa hai koi
dil ki dahliz pe chup-chaap khaDaa hai koi

jalaao gham ke diye pyaar ki nigaahon mein
ki tirgi hai bahut zindagi ki raahon mein