aankhon ko tamanna hai khaak-e-dar-e-jaanaan ki — Aish Meeruthi

meri jannat tiri nigaah-e-karam
mujh se phir jaae ye khudaa na kare

uThaane vaale hamein bazm se zaraa ye dekh
ki TuTtaa hai gharibon kaa aasraa kaise

karun kis kaa gila kahte hue bhi sharm aati hai
raqib afsos apne hi puraane aashnaa nikle

na milne par bhi use 'aish' pyaar kartaa huun
yuun unchaa kar diyaa meaar-e-zindagi main ne

baDhti rahi nigaah bahakte rahe qadam
guzraa hai is tarah bhi zamaana shabaab kaa

ye bhi koi zindagi mein zindagi hai ham-nafas
dil kahin hai ham kahin hain aur jaanaana kahin

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

baandhaa thaa khud hi aap ne paighaam-e-iltifaat
kyaa baat thi jo aap hi khud bad-gumaan hue

abhi dikhaao na tasvir-e-zindagi is ko
ye bachpanaa hai abhi muskuraanaa chaahtaa hai

sataanaa qatl karnaa phir jalaanaa
vo be-taalim kyaa kyaa jaante hain