mai-e-kohna na sahi khun-e-tamannaa hi sahi — Akhtar Lakhnvi

hasad kaa rang pasandida rang hai sab kaa
yahaan kisi ko koi ab duaa nahin detaa

mausam-e-gul tire sadqe tiri aamad ke nisaar
dekh mujh se miraa saaya bhi judaa hai ab ke

jazbe ki kaDi dhuup ho to kyaa nahin mumkin
ye kis ne kahaa sang pighaltaa hi nahin hai

suune kitne baam hue kitne aangan be-nur hue
chaand se chehre yaad aate hain chaand nikalte vaqt bahut

hamein khudaa pe bharosa hai naa-khudaa pe nahin
khudaa jo detaa hai vo naa-khudaa nahin detaa

ik tere hi kuche par mauquf nahin hai kuchh
har gaam hain taazirein ham log jahaan bhi hain

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

gham hai na ab khushi hai na ummid hai na yaas
sab se najaat paae zamaane guzar gae

tumhein fursat ho duniyaa se to ham se aa ke milnaa
hamaare paas fursat ke sivaa kyaa rah gayaa hai

zamaana mujh se judaa ho gayaa zamaana huaa
rahaa hai ab to bichhaDne ko mujh se tu baaqi

vo na aaegaa hamein maalum thaa is shaam bhi
intizaar us kaa magar kuchh soch kar karte rahe

ret par ik nishaan hai shaayad
ye hamaaraa makaan hai shaayad