andhaa safar hai ziist kise chhoD de kahaan — Akram Naqqash

jaise paani pe naqsh ho koi
raunaqein sab adam-sabaat rahin

ye kaun si jagah hai ye basti hai kaun si
koi bhi is jahaan mein tere sivaa nahin

jiyungaa main tiri saanson mein jab tak
khud apni saans mein zinda rahungaa

kuchh to inaayatein hain mire kaarsaaz ki
aur kuchh mire mizaaj ne tanhaa kiyaa mujhe

ishq ik aisi haveli hai ki jis se baahar
koi darvaaza khule aur na daricha nikle

hazaar kaarvaan yuun to hain mere saath magar
jo mere naam hai vo qaafila kab aaegaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

yaar bhi raah ki divaar samajhte hain mujhe
main samajhtaa thaa mire yaar samajhte hain mujhe

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

yuun to maujud apne ghar mein hai
aadmi mustaqil safar mein hai

safar mein aise kai marhale bhi aate hain
har ek moD pe kuchh log chhuT jaate hain

phir ret ke dariyaa pe koi pyaasaa musaafir
likhtaa hai vahi ek kahaani kai din se