main ne bachpan mein adhuraa khvaab dekhaa thaa koi — Alam Khursheed

kabhi kabhi kitnaa nuqsaan uThaanaa paDtaa hai
airon ghairon kaa ehsaan uThaanaa paDtaa hai

kisi ke raste pe kaise nazrein jamaae rakkhun
abhi to karnaa mujhe hai khud intizaar meraa

tamaam rang adhure lage tire aage
so tujh ko lafz mein tasvir kartaa rahtaa huun

tahzib ki zanjir se uljhaa rahaa main bhi
tu bhi na baDhaa jism ke aadaab se aage

kisi ko DhunDte hain ham kisi ke paikar mein
kisi kaa chehra kisi se milaate rahte hain

ishq mein tahzib ke hain aur hi kuchh falsafe
tujh se ho kar ham khafaa khud se khafaa rahne lage

mere khvaabon ke jharokon ko sajaate rahiye
na sahi vasl magar yaad to aate rahiye

hasin khvaab ko sachchaa samajh rahaa hai koi
faqat gumaan ko duniyaa samajh rahaa hai koi

hamaari zindagi jaise koi shab bhar kaa jalsa hai
sahar hote hi khvaabon ke gharaunde TuuT jaate hain

raat bhar khvaab dekhne vaale
din ki sachchaaiyon mein chikh uThe

baiThe-baiThe kaa safar sirf hai khvaabon kaa futur
jism darvaaze tak aae to gali tak pahunche

jiinaa mushkil to bahut hai tiri is duniyaa mein
lekin is khvaab ko marnaa bhi nahin chaahiye hai