ye khamoshi miri khamoshi hai — Azhar Faragh

ye nahin dekhte kitni hai riyaazat kis ki
log aasaan samajh lete hain aasaani ko

bahut se saanp the is ghaar ke dahaane par
dil is liye bhi khazaana shumaar hone lagaa

badal ke dekh chuki hai reaayaa saahib-e-takht
jo sar qalam nahin kartaa zabaan khinchtaa hai

bhanvar se ye jo mujhe baadbaan khinchtaa hai
zarur koi havaaon ke kaan khinchtaa hai

dalil us ke dariche ki pesh ki main ne
kisi ko patli gali se nahin nikalne diyaa

aisi ghurbat ko khudaa ghaarat kare
phuul bhejvaane ki gunjaaish na ho

main baDaa ho gayaa huun magar bachpanaa
mere dil se kabhi bhi gayaa hi nahin

aur is se pahle ki saabit ho jurm-e-khaamoshi
ham apni raae kaa izhaar karnaa chaahte hain

sukut baDhne lagaa hai sadaa zaruri hai
ki jaise habs mein taaza havaa zaruri hai

ye tamannaa hai ki ab aur tamannaa na karein
sher kahte rahein chup chaap taqaazaa na karein

us ne aanchal se nikaali miri gum-gashta bayaaz
aur chupke se mohabbat kaa varaq moD diyaa

ragon mein zahr-e-khamoshi utarne se zaraa pahle
bahut taDpi koi aavaaz marne se zaraa pahle