kis qadar bad-naamiyaan hain mere saath — Anwar Shuoor

go mujhe ehsaas-e-tanhaai rahaa shiddat ke saath
kaaT di aadhi sadi ek ajnabi aurat ke saath

zamaane ke jhamelon se mujhe kyaa
miri jaan! main tumhaaraa aadmi huun

miri hayaat hai bas raat ke andhere tak
mujhe havaa se bachaae rakho savere tak

kabhi rotaa thaa us ko yaad kar ke
ab aksar be-sabab rone lagaa huun

divaar-e-zindaan ke pichhe
jurm-e-mohabbat mein baiThaa huun

aadmi ke liye ronaa hai baDi baat 'shuur'
hans to sakte hain sab insaan hansi mein kyaa hai

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

ye aansu ponchh lijiye aur muskuraaiye
chaara nahin hai koi bhi rukhsat kiye baghair

husn jalva dikhaa gayaa apnaa
ishq baiThaa rahaa udaas kahin

is naghmagi kaa thoDaa gunah-gaar main bhi huun
mujh se bhi is jahaan mein halchal rahi hai dost

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai