aati kab hai roz bulaanaa paDti hai — Ashfaq Shaheen

itni zamin hi chaahiye bas mujh ko gaanv mein
jaa kar paDaa rahun main jahaan maan ke paanv mein

ham tire hijr mein yuun zard hue jaate hain
log takte hain to hamdard hue jaate hain

akelaa aa rahaa hai yaa unhein bhi saath laataa hai
zaraa puchho khabar to lo december kyaa bataataa hai

iraade garche lahron ke baDe sadmaat vaale hain
ye dariyaa ko bataa denaa ki ham gujraat vaale hain

subh-e-nau ke vaaste bekaar huun
main guzishta roz kaa akhbaar huun

main adh-maraa gulaab sar-e-shaakh-e-nim-jaan
haathon se tu ne mujh ko sanvaaraa to main gayaa

apni anaa ki aaj bhi taskin ham ne ki
ji bhar ke us ke husn ki tauhin ham ne ki

kyon tasavvur mein ji rahaa huun main
jab haqiqat mein mar hi jaanaa hai

vo kuchh muskuraanaa vo kuchh jheinp jaanaa
javaani adaaein sikhaati hain kyaa kyaa

anaa anaa ke muqaabil hai raah kaise khule
taalluqaat mein haail hai baat ki divaar

tum ne taaron ko rahnumaa jaanaa
ham ne taaron ki rahnumaai ki

mai-kade mein ishq ke kuchh sarsari jaanaa nahin
kaasa-e-sar ko yahaan gardish hai paimaane ki tarah