rahguzar bhi tiri pahle thi ajnabi — Ashhar Hashmi

us se milne ki talab mein ji liye kuchh aur din
vo bhi khud biite dinon se bar-sar-e-paikaar thi

vahin ke pattharon se puchh meraa haal-e-zindagi
main reza reza ho ke jis dayaar mein bikhar gayaa

zindagi karnaa vo mushkil fan hai 'ashhar' haashmi
jaise ki chalnaa paDe bijli ke nange taar par

meri duniyaa mein samundar kaa kahin naam nahin
phir ghaTaa pheinkti hai mujh pe ye patthar kaise

'ashhar' kahin qarib hi taarik ghaar hai
jugnu ki raushni ko vahin chal ke chhoD dein

tiraa ghurur jhuk ke jab milaa mire vajud se
na jaane meri kamtari kaa chehra kyuun utar gayaa

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

kahaan milegi misaal meri sitamgari ki
ki main gulaabon ke zakhm kaanTon se si rahaa huun

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

gul kiyaa jis ne vo thaa aur magar
shama ne shikva havaaon se kiyaa

gulaabon ke honTon pe lab rakh rahaa huun
use der tak sochnaa chaahtaa huun

ghaTaa dekh kar khush huiin laDkiyaan
chhaton par khile phuul barsaat ke