nami utar gai dharti mein tah-ba-tah 'aslam' — Aslam Emadi

unhein ye fikr ki dil ko kahaan chhupaa rakkhein
hamein ye shauq ki dil kaa khasaara kyunkar ho

havaaein shahr ki aaluda-e-kasaafat hain
ye saaf-suthraa-pan aur ye nafaasatein jhuTi

tumhaare dard se jaage to un ki qadr khuli
vagarna pahle bhi apne the jism-o-jaan vahi

tum mire kamre ke andar jhaankne aae ho kyuun
so rahaa huun chain se huun Thiik hai sab Thiik hai

hazaar raaste badle hazaar svaang rache
magar hai raqs mein sar par ik aasmaan vahi

ham bhi 'aslam' isi gumaan mein hain
ham ne bhi koi zindagi ji thi

shaahraahein dafatan shoale ugalne lag gaiin
ghar ki jaanib chal paDaa hai shahr gheraa kar tamaam

main tujh se saath bhi to umar bhar kaa chaahtaa thaa
so ab tujh se gilaa bhi umar bhar kaa ho gayaa hai

kahaan milegi misaal meri sitamgari ki
ki main gulaabon ke zakhm kaanTon se si rahaa huun

gul kiyaa jis ne vo thaa aur magar
shama ne shikva havaaon se kiyaa

baad muddat ke gulaabon ki mahak aai hai
us ne pardes se bhejaa koi khat hai mujh ko

gale mein us ke khudaa ki ajiib barkat hai
vo boltaa hai to ik raushni si hoti hai