'mir' 'ghaalib' yahin to rahte the — Aslam Rashid

kuchh sazaa aur baDh gai is par
zakhm khaae to muskuraae kyon

mujh se baahar nikal rahe the sab
main bhi hairaan saa nikal aayaa

din din bhar aaina dekhaa jaataa hai
tab jaa kar do chaar ishaare bante hain

aap kaa to shauq hai jalte gharon ko dekhnaa
aap aankhein nam kareinge aap rahne dijiye

qabr par phuul rakhne aayaa thaa
phir yahin ghar banaa liyaa main ne

hansi un ke labon tak aa gai hai
mukammal ho gayaa ronaa hamaaraa

main baDaa ho gayaa huun magar bachpanaa
mere dil se kabhi bhi gayaa hi nahin

'saif' andaaz-e-bayaan rang badal detaa hai
varna duniyaa mein koi baat nai baat nahin

badalte vaqt ne badle mizaaj bhi kaise
tiri adaa bhi gai meraa baankpan bhi gayaa

is kaa ronaa nahin kyuun tum ne kiyaa dil barbaad
is kaa gham hai ki bahut der mein barbaad kiyaa

ab dil kaa safina kyaa ubhre tufaan ki havaaein saakin hain
ab bahr se kashti kyaa khele maujon mein koi girdaab nahin

kiraaya-daar badalnaa to us kaa sheva thaa
nikaal kar vo bahut khush huaa makaan se mujhe