tufaan-e-bahr khaak Daraataa mujhe 'turaab' — Ata Turab

kyaa kyaa na pyaas jaage mire dil ke dasht mein
hasrat bhi ek aag hai laage jo raat bhar

vo ik sukhan hi hamaari sanad na ban jaae
vo ik sukhan jo tumhaari sanad nahin rakhtaa

chaahiye kyaa tumhein tohfe mein bataa do varna
ham to baazaar ke baazaar uThaa laaeinge

haan tujhe bhi to mayassar nahin tujh saa koi
hai tiraa arsh bhi viraan mire pahlu ki tarah

ishq to apne lahu mein hi sanvartaa hai so ham
kis liye rukh pe koi ghaaza lagaa kar dekhein

yuun mohabbat se na ham khaana-ba-doshon ko bulaa
itne saada hain ki ghar-baar uThaa laaeinge

shor din ko nahin sone detaa
shab ko sannaaTaa jagaa detaa hai

aisi duniyaa mein kab tak guzaaraa karein tum hi kah do ki kaise gavaaraa karein
raat mujh se miri bebasi ne kahaa bebasi ke liye ek taaza ghazal

har ek shaakh pe viraaniyaan musallat hain
badan-darakht bhi goyaa hai aashiyaan-e-shab

tum aake lauT gae phir bhi ho yahin maujud
tumhaare jism ki khushbu mire makaan mein hai

itni siyaah-raat mein itni si raushni
ye chaand vo nahin miraa mahtaab aur hai

ek din vo zarron ko aaftaab kar leinge
dhuup ke jo khvaahaan hain raat ke andhere mein