kisi ne bhejaa hai khat pyaar aur vafaa likh kar — Ateeq Anzar

shaam ke dhundlakon mein Dubtaa hai yuun suraj
jaise aarzu koi mere dil mein marti hai

bichhaDte vaqt anaa darmiyaan thi varna
manaanaa donon ne ik dusre ko chaahaa thaa

gaanv ke parinde tum ko kyaa pataa bideson mein
raat ham akelon ki kis tarah guzarti hai

gham ki band muTThi mein ret saa miraa jivan
jab zaraa kasi muTThi zindagi bikharti hai

tujh se mil kar bhi udaasi nahin jaati dil ki
tu nahin aur koi meri kami ho jaise

use dekhne ki thi aarzu mujhe us ki thi baDi justuju
magar us ke aariz-e-naaz pe miri har nigaah phisal gai

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

un se hanste hi hanste mohabbat si shai
hone vaali kahin thi magar ho gai

jahaan hasin hai mohabbat ki dil-navaazi se
magar ye raaz koi khaal-khaal hi jaane

dil hai gar pyaar se sarshaar to mumkin hai 'habib'
tu jidhar jaae vo raah-e-dar-e-jaanaana bane

aap pahlu mein jo baiThein to sambhal kar baiThein
dil-e-betaab ko aadat hai machal jaane ki