na jaane kaun si manzil pe ishq aa pahunchaa — Aziz

zamir bechne vaale vo teraa saudaa-gar
zamir hi nahin zaat o sifaat le ke gayaa

shahr ho dasht-e-tamannaa ho ki dariyaa kaa safar
teri tasvir ko siine se lagaa rakkhaa hai

ye baat sach hai ki marnaa sabhi ko hai lekin
alag hi hoti hai lazzat nigaah-e-qaatil ki

Duubaa safina jis mein musaafir koi na thaa
lekin bhare hue the vahaan naa-khudaa bahut

shaayad yahi kitaab-e-mohabbat ho laa-javaab
meri vafaa ke saath hai teri jafaa bahut

sabhi se jab mohabbat chaahte ho
mohabbat kyon nahin karte sabhi se

kisi se ishq apnaa kyaa chhupaaein
mohabbat Tapki paDti hai nazar se

husn jalva dikhaa gayaa apnaa
ishq baiThaa rahaa udaas kahin

mil mil gae hain khaak mein laakhon dil-e-raushan
har zarra mujhe arsh kaa taaraa nazar aayaa

mujhe maalum hai ahl-e-vafaa par kyaa guzarti hai
samajh kar soch kar tujh se mohabbat kar rahaa huun main

ziist se tang ho ai 'daagh' to jiite kyuun ho
jaan pyaari bhi nahin jaan se jaate bhi nahin