shaayad yahi kitaab-e-mohabbat ho laa-javaab — Aziz

na jaane kaun si manzil pe ishq aa pahunchaa
duaa bhi kaam na aae koi davaa na lage

zamir bechne vaale vo teraa saudaa-gar
zamir hi nahin zaat o sifaat le ke gayaa

shahr ho dasht-e-tamannaa ho ki dariyaa kaa safar
teri tasvir ko siine se lagaa rakkhaa hai

ye baat sach hai ki marnaa sabhi ko hai lekin
alag hi hoti hai lazzat nigaah-e-qaatil ki

Duubaa safina jis mein musaafir koi na thaa
lekin bhare hue the vahaan naa-khudaa bahut

bil-aakhir thak haar ke yaaro ham ne bhi taslim kiyaa
apni zaat se ishq hai sachchaa baaqi sab afsaane hain

shama bujh kar rah gai parvaana jal kar rah gayaa
yaadgaar-e-husn-o-ishq ik daagh dil par rah gayaa

sabhi se jab mohabbat chaahte ho
mohabbat kyon nahin karte sabhi se

na paak hogaa kabhi husn o ishq kaa jhagDaa
vo qissa hai ye ki jis kaa koi gavaah nahin

sau fasaad ek ishq mein uTThe
boyaa ik tukhm uge hazaar darakht

sach ishq mein hain aashiq o maashuq baraabar
jo mushkil-e-majnun hai so hai mushkil-e-lailaa