shuur-e-zindagi ki raushni mein — Azmat Abdul Qayyum Khan

jo bijliyon ki panaahon mein tum banaa sakte
to is qadar na tumhein khauf-e-aashiyaan hotaa

manzil pe nazar aai bahut duri-e-manzil
be-saakhta aane lage sab raah-numaa yaad

aabaad mai-kade bhi hain dair-o-haram bhi nahin
lekin na aadmi ko milaa koi aadmi

ab zamaane se aur kyaa maangun
daulat-e-gham bahut ziyaada hai

zindagaani kaa lutf to 'azmat'
sirf tufaan ki panaah mein hai

kal ye mumkin hai ki lahraaein khushi ke giit bhi
har nazar mein aaj ik khaamosh saa aalam sahi

jab ki pahlu se yaar uThtaa hai
dard be-ikhtiyaar uThtaa hai

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

ik sadma-e-mohabbat ik sadma-e-judaai
ginti ke do hain lekin laakhon ki jaan par hain

ye saal tul-e-masaafat se chuur chuur gayaa
ye ek saal to guzraa hai ik sadi ki tarah