mohabbat adaavat vafaa be-rukhi — Bashir Badr

na tum hosh mein ho na ham hosh mein hain
chalo mai-kade mein vahin baat hogi

bhuul shaayad bahut baDi kar li
dil ne duniyaa se dosti kar li

ik shaam ke saae tale baiThe rahe vo der tak
aankhon se ki baatein bahut munh se kahaa kuchh bhi nahin

khudaa aise ehsaas kaa naam hai
rahe saamne aur dikhaai na de

hasin to aur hain lekin koi kahaan tujh saa
jo dil jalaae bahut phir bhi dilrubaa hi lage

khudaa ki itni baDi kaaenaat mein main ne
bas ek shakhs ko maangaa mujhe vahi na milaa

sabhi se jab mohabbat chaahte ho
mohabbat kyon nahin karte sabhi se

husn jalva dikhaa gayaa apnaa
ishq baiThaa rahaa udaas kahin

baal apne baDhaate hain kis vaaste divaane
kyaa shahr-e-mohabbat mein hajjaam nahin hotaa

ifshaa-e-raaz-e-ishq mein go zillatein huiin
lekin use jataa to diyaa jaan to gayaa

yaa ilaahi is dil-e-betaab ki taamir mein
kis ne patthar rakh diyaa thaa ishq ki buniyaad kaa

apne dushman ko bhi mohabbat de
ishq ke daaere ko vusat de