lazzat-e-ishq ilaahi miT jaae — Dagh Dehlvi

hazrat-e-'daagh' hai ye kucha-e-qaatil uThiye
jis jagah baiThte hain aap to jam jaate hain

dil hi to hai na aae kyuun dam hi to hai na jaae kyuun
ham ko khudaa jo sabr de tujh saa hasin banaae kyuun

baad muddat ke ye ai 'daagh' samajh mein aayaa
vahi daanaa hai kahaa jis ne na maanaa dil kaa

na ronaa hai tariqe kaa na hansnaa hai saliqe kaa
pareshaani mein koi kaam ji se ho nahin saktaa

sar miraa kaaT ke pachhtaaiyegaa
jhuTi phir kis ki qasam khaaiyegaa

kal tak to aashnaa the magar aaj ghair ho
do din mein ye mizaaj hai aage ki khair ho

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

husn jalva dikhaa gayaa apnaa
ishq baiThaa rahaa udaas kahin

ab bhi aksar shab-e-tanhaai mein kuchh tahrirein
chaand ke aks se ho jaati hain raushan raushan

band rahte hain jo alfaaz kitaabon mein sadaa
gardish-e-vaqt miTaa deti hai pahchaan un ki

gham se mansub karun dard kaa rishta de duun
zindagi aa tujhe jiine kaa saliqa de duun