jaisaa ji mein aae vaisaa kar jaanaa — Fatima Mehru

tasviron par mat jaanaa
saali jhuTi hoti hain

ye ghalat-fahmiyon kaa mausam hai
apne dil ko sanbhaal kar rakhnaa

nahin charaagh jalaaeinge ab kisi dar par
ham aap apni mohabbat mazaar kar leinge

tire hijrat ke maare bastiyon se laD rahe hain
jinhein yaksar tire dil mein Thikaana chaahiye thaa

chhoD jaaeinge tujhe chaand ke charche sun kar
chaDhte suraj ke pujaari hain tire divaane

vo koh-e-qaaf kaa jaise makin ho gayaa hai
bichhaD ke aur ziyaada hasin ho gayaa hai

kyon tasavvur mein ji rahaa huun main
jab haqiqat mein mar hi jaanaa hai

apni anaa ki aaj bhi taskin ham ne ki
ji bhar ke us ke husn ki tauhin ham ne ki

vo jis kaa shauq hai khilte gulaab mal denaa
gale milo to use bhi udaas kar jaanaa

laraz rahi hai zamin sahmi laDkiyon ki tarah
pukaarti hai ki tanhaa na chhoD kar jaanaa

havas ne toD di barson ki saadhnaa meri
gunaah kyaa hai ye jaanaa magar gunaah ke baad

donon bahr-e-shola-e-zaat donon asir-e-anaa
dariyaa ke lab par paani dasht ke lab par pyaas