agar tu ittifaaqan mil bhi jaae — Hafeez Hoshiarpuri

aah marg-e-aadmi par aadmi roe bahut
koi bhi royaa na marg-e-aadamiyyat ke liye

tiri talaash mein jab ham kabhi nikalte hain
ik ajnabi ki tarah raaste badalte hain

ham ko manzil ne bhi gumraah kiyaa
raaste nikle kai manzil se

dosti aam hai lekin ai dost
dost miltaa hai baDi mushkil se

zamaane bhar ke gham yaa ik tiraa gham
ye gham hogaa to kitne gham na honge

mohabbat karne vaale kam na honge
tiri mahfil mein lekin ham na honge

gham hai na ab khushi hai na ummid hai na yaas
sab se najaat paae zamaane guzar gae

jab ki pahlu se yaar uThtaa hai
dard be-ikhtiyaar uThtaa hai

ishq udaasi ke paighaam to laataa rahtaa hai din raat
lekin ham ko khush rahne ki aadat bahut ziyaada hai

husn jalva dikhaa gayaa apnaa
ishq baiThaa rahaa udaas kahin

chhuT jaae agar daaman-e-kaunain to kyaa gham
lekin na chhuTe haath se daamaan-e-mohammad

ye bhi fareb se hain kuchh dard aashiqi ke
ham mar ke kyaa kareinge kyaa kar liyaa hai ji ke