dard ko rahne bhi de dil mein davaa ho jaaegi — Hakim Mohammad Ajmal Khan Shaida

charchaa hamaaraa ishq ne kyuun jaa-ba-jaa kiyaa
dil us ko de diyaa to bhalaa kyaa buraa kiyaa

duniyaa bas is se aur ziyaada nahin hai kuchh
kuchh roz hain guzaarne aur kuchh guzar gae

rukhsaar par hai rang-e-hayaa kaa farogh aaj
bose kaa naam main ne liyaa vo nikhar gae

vo sar hi kyaa ki jis mein tumhaaraa na ho khayaal
vo dil hi kyaa ki jis mein tumhaaraa guzar na ho

mai na ho bu hi sahi kuchh to ho rindon ke liye
isi hiile se bujhegi havas-e-jaam-e-sharaab

bhalaa tu aur ghar aae mire kyun-kar yaqin kar luun
takhayyul kyuun na ho meraa tiri aavaaz-e-paa kyuun ho

gham hai na ab khushi hai na ummid hai na yaas
sab se najaat paae zamaane guzar gae

husn jalva dikhaa gayaa apnaa
ishq baiThaa rahaa udaas kahin

jab ki pahlu se yaar uThtaa hai
dard be-ikhtiyaar uThtaa hai

musalsal haadson se bas mujhe itni shikaayat hai
ki ye aansu bahaane ki bhi to mohlat nahin dete

main us ko aansuon se likh rahaa huun
ki mere baa'd koi paDh na paae

abr-e-bahaar ab bhi jachtaa nahin nazar mein
kuchh aansuon ke qatre ab bhi hain chashm-e-tar mein