miri khvaahish hai duniyaa ko bhi apne saath le aauun — Iqbal Naved

khudaa jaane girebaan kis ke hain aur haath kis ke hain
andhere mein kisi ki shakl pahchaani nahin jaati

khvaahishon ke peD se girte hue patte na chun
zindagi ke sehn mein ummid kaa paudaa lagaa

raat bhar koi na darvaaza khulaa
dastakein deti rahi paagal havaa

pheink de baahar ki jaanib apne andar ki ghuTan
apni aankhon ko lagaa de ghar ki har khiDki ke saath

ab itni zor se har ghar pe dastakein denaa
agar javaab na aae to dar nikal jaae

bas ek pal ki tamannaa-e-vasl ki khaatir
tamaam 'umr lagaa di gai sanvarne mein

miri tamannaa hai ab ke tum phir milo to ji bhar ke muskuraaein
ki dekhnaa hai ye raushni kaa safar bahut der baa'd jaa kar

khvaab aur tamannaa kaa kyaa hisaab rakhnaa hai
khvaahishein hain sadiyon ki umr to zaraa si hai

ai hasrat-e-dil go vasl huaa par shauq hamaaraa kam na huaa
jis se ki khalish kuchh aur baDhe vo zakhm huaa marham na huaa

main tohfa le ke aayaa huun tamannaaon ke phulon kaa
luTaane ko bahaar-e-zindagaani le ke aayaa huun

gadaa nahin hain ki dast-e-savaal phailaaein
kabhi na aap ne puchhaa ki aarzu kyaa hai