teri yaadon kaa hi sarmaayaa liye baiThe hain — JaiKrishn Chaudhry Habeeb

bichhDe mujh se is tarah vo zindagi ke ham-safar
bujh gae hon jalte jalte jaise raste ke charaagh

'habib' khud hi banaaeinge roz-o-shab apne
huaa hi kyaa jo zamaane ne saath chhoD diyaa

har ik fasurda qalb pe chhaai shaguftagi
jab chhiD gai hai bazm mein us gul-badan ki baat

baDhti gaiin jafaaein jahaan raah-e-shauq mein
josh-e-junun baDhaataa gayaa tez-tar mujhe

paa ke ik teraa tabassum muskuraai kaaenaat
jhuum uTThaa vo bhi dil jiine se jo bezaar thaa

nikhat vahi surur vahi dil-kashi vahi
aamad ye aap ki hai ki jhonkaa bahaar kaa

mere khvaabon ke jharokon ko sajaate rahiye
na sahi vasl magar yaad to aate rahiye

sab ko ham bhuul gae josh-e-junun mein lekin
ik tiri yaad thi aisi jo bhulaai na gai

tum parindon se ziyaada to nahin ho aazaad
shaam hone ko hai ab ghar ki taraf lauT chalo

paan khaa kar jo ugaal aap ne thukaa saahab
jauhari mahv hue laal-e-yaman yaad aayaa

is hi buniyaad par kyuun na mil jaaein ham
aap tanhaa bahut ham akele bahut

lipTaa ke shab-e-vasl vo us shokh kaa kahnaa
kuchh aur havas is se ziyaada to nahin hai